Стварэнне новай партыі «Разам» расколвае і дэкансалідуе дэмакратычныя сілы?

Ці можа раз’яднаць апазіцыю новая партыя, і як санкцыі ЗША ды заклікі здымаць грошы з банкаўскіх рахункаў могуць падарваць эканоміку?

У студыі ток-шоу «Кожны з нас» – палітолаг Павел Усаў, палітычная аглядальніца і рэдактарка сайту «Наше мнение» Валерыя Касцюгова, філосаф Павел Баркоўскі, старшыня Партыі БНФ і кандыдат на прэзідэнцтва – 2010 Рыгор Кастусёў, а таксама кандыдатка на прэзідэнцтва – 2015 Таццяна Караткевіч.

Эксперты ў студыі спрачаюцца наконт закліку Віктара Бабарыкі стварыць новую партыю – «Разам». Што можа пераламаць хаду падзеяў? Можа, заклікі кампаніі «Банкамат – абменнік – банк» ад Нацыянальнага антыкрызіснага ўпраўлення Паўла Латушкі? Ці надышоў час пераводзіць рублі ў долары з прыцэлам на маштабны фінансавы крызіс? Як на працэсы можа паўплываць аднаўленне амерыканскіх санкцыяў? І ці ўзнікла новая пагроза суверэнітэту Беларусі?

Праграма «Кожны з нас» выходзіць штосераду а 18:30. Глядзіце праз спадарожнік «Астра 4A» (ранейшая назва «Sirius 4»), онлайн, на YouTube-канале «Белсат Life» і на нашай старонцы.

Комментарии

АБ ІМІТАЦЫІ

Глупству няма мяжы. Новая прамаскоўская квазі-апазыцыя (газпрамаўскага кшталту) заклікае грамадзтва галасаваць за дыялог з Лукашэнкам і адзначыцца аб гэтым у Сеціве, а бізнэсовая канторская інтэрнэт-платформа “Голас” ужо пачала падлічваць аматараў дыялогу.

Лукашысцкі рэжым, які валодае палітычнай ініцыятывай, паўнатой улады, рэпрэсіўнымі сродкамі і магчымасьцямі, зразумела, на гэта не зьвяртае ўвагі, бо пабуджальнікі да дыялогу ёсьць у яго разуменьні палітычныя паражэнцы; другое — не ўяўляюць самастойнай палітычнай сілы, ня маюць рэальнай структурнай арганізацыі і ня маюць рэсурсаў, бо існуюць на падтрымку заходніх дапамаговых арганізацыяў.

Таксама яны ня маюць шырокага ўплыву на грамадзтва і пры гэтым характарызуюцца неадэкватнасьцю ўяўленьняў аб рэчаіснасьці.

Патрабуюць, напрыклад, каб ня толькі Лукашэнка, але каб і Пуцін сустракаўся зь імі і ўступіў у перамовы.

Усё гэта выглядае палітычным ідыятызмам. Новыя “квазі” не разумеюць, што ў палітычным плане яны ва ўяўленьнях Пуціна і Лукашэнкі — мізэр, нікчэмнае аматарства (амаль нішто), і ніякая варожая ўлада перамаўляцца зь імі ды ўступаць у дыялог ня мае патрэбы, ня гледзячы на іхныя спэктакулярныя ваяжы па Эўропе і запрашэньні гэтых падстаўных асобаў з боку заходняга “істэблішмэнта”.

Другое — больш істотнае. Ні на якія дыялогі з новай квазі-апазыцыяй (нават калі б яна нешта ўяўляла) Лукашэнка, які адмовіўся гаварыць з Мэркель і парваў дачыненьні з Захадам, — ня пойдзе.

Ня пойдзе ніколі і ні з кім, пакуль у яго будзе ўлада і заплечча ў Маскве (і па сваёй псіхапатычнай натуры таксама).

І тады пытаньне: навошта, ня гледзячы на абсурд, узьнікае чарговая пустапарожняя ініцыятыва і ілюзія дзейнасьці квазі-апазыцыі №2?

Дакапацца да зьместу можна, паставіўшы рытарычнае пытаньне: каму гэта трэба і каму гэта выгадна?

Выгадна найперш Маскве, каб справакаваць у Беларусі псэўдапалітычную “бадзягу”, пустапарожнюю ініцыятыву, якая адцягне ўвагу людзей на дасягненьне ілюзій.

А сама Масква ў гэты час будзе пасьлядоўна душыць свайго сатрапа, якога загнала ў тупік, каб ціха ўводзіць у Беларусь свае войскі, самалёты, ствараць ваенныя базы падрыхтоўкі агрэсіі супраць Украіны і Польшчы, заграбаць беларускія прадпрыемствы і душыць беларушчыну рукамі Лукашэнкі.

А вы, “беларусцы”, галасуйце, галасуйце, наша платформа “Голас” усё падліча.

Рычагі ўплыву на Лукашэнку ў Захада ёсьць. Але гэта, найперш, павінен бы быў быць уплыў Амэрыкі і яе ціск на Пуціна (каб вывесьці рускія войскі зь Беларусі, не падтрымліваць і не ўзбройваць антыбеларускі рэжым, выдаліць рускую авіацыю зь Беларусі, перастаць фінансаваць рэпрэсіі і гвалт над беларускім народам і інш.).

Але гэта ўжо палітычныя задачы для іншых людзей.

20 сакавік 2021 г.

Зянон ПАЗЬНЯК

Каласы пад сярпом тваiм
Добавить комментарий

Наше Мнение © 2003-2021

Публикация писем читателей не означает согласие авторов проекта с высказанным мнением.